Juullip inuanut allakkat amerliartorput

Kisianni Nuuk Tourismip matunerata kingorna, allakkat ilumut akineqassanersut, taamaassappallu kikkut taamaaliussanersut ilisimaneqanngilaq.
Post Greenlandimiilli suli neriuupput. Post Greenlandimi tuniniaanemut pisortaq, Salik Hard, ima oqarpoq

Nuummi allakkerivimmi juullip inuanut allakkat poorsuanni tunugujortumi pooqartut 1000t missaannik amerlassuseqalereerput, taakkua meeqqat Tysklandimeersut Frankrigimeersut Danmarkimeersullu ilaatigut takuneqarsinnaapput

Juullip inuata allakkerivia Nuuk Tourismemit ingerlanneqarsimasoq akiliisinnaajunnaarluni matummat,  pigisai aamma nalillit, taakkunnga ilanngullugit juullip inuanut allakkat akineqarnissaannut isumaginninneq,  maanna tuniniarneqarput. Nuuk Tourismeusimasup pigisaanik tuniniaaneq Eqqartuussissuserisup Britta Keldsenip isumagivaa.

Juullip inuanut allakkat Nuummi allakkerivimmi katersorneqarput.
"Suli juullinngilaq allakkat katersorpagut,  iginnavianngilagut soorunami, neriuppugut allakkat nunatsinneersunit akineqarumaartut " Salik Hard oqarpoq.
Nuuk Tourismep atia takornartitsivimmut Tupilak Travelimut ippassaq tunineqarpoq, "Illoqarfiup Nuup takornarianik soqutiginnittut pinerullugit, ateq Nuuk Tourisme pisiaraarput,  Hans Peder Kirkegaard takornariartitseqatigiiffimmi Tupilak Travelimi siunnersorti oqarpoq.

Juullip inuata allakkerivianik aamma takornariartitseqatigiiffiup Nuuk Tourismiusimasup ilaanik pisiumallutik soqutiginnittut maanna isumaqatiginiarfigineqarput, akilisiinnaajunaarluni matusup Nuuk Tourismip pisigisaanik nalilinnik isumaginnittua Britta Keldsen, eqqartuussisuuseriffimmi Keldsen aamma Paulsenimeersoq oqarpoq.
Kikkut imaluunniit kina pisiumallutik soqutiginnillutik nalunaarsimanersut  oqaatigisinnaannginnerarpai, isumaqatigiinniarnerit ingerlammata, Britta Keldsen oqarpoq, taassuma naatsorsuutigivaa, isumaqatigiinniarnerit sapaatip akunnerata ataatsip ingerlanerani naammassineqarumaartut.

Juullip inuanut allakkat sumut ingerlateqqinneqassanersut  aamma kikkunnit akineqassanersut ilisimaneqanngilaq.
Juullip tungaanut allakkat akineqarnissaannut aamma tiguneqarnissaannut aaqqiisoqarsimanngippat allakkat juullip kingorna nassitsisuinut utertinneqartariaqassaspput, Salik Hard oqarpoq.
Salik Hard Post Greenlandimi tuniniaanermut pisortaq neriuppoq, allakkaat akineqarumaartut tassami meerarpassuit pakatsisinneqassanngippata akineqartariaqarput, taannalu neriuuteqarpoq akineqarnissaannik.