Koda nersornaasiissaaq
KODA-p nunatsinni nipilersornermik suliaqartunut nersornaasiuttagaa sapaatit akunneri pingasut qaangiuppata tunniunneqassaaq. Tamanna pissaaq Katuami novembarip 23-anni, nersornaasiinerlu KNR-TV-kkut toqqaannartumik aallakaatinneqassaaq.
Nipilersukkat radiukkut allatigullu atorneqartartut akissarsiassartaasa erinniortunut taalliortunullu ingerlateqqinissaat KODA-p nakkutigisaraa.
Pisarnertut nersornaatit pingasut tunniunneqassapput, siulleq ukiup ingerlanerani saqqummiisumut immikkut malugisariaqartumut, aappaat saqqummersitserlaamut piginnaaneqarluartumut pingajuallu ukiut ingerlaneranni nipilersornerup iluani immikkut malunnaateqarsimasumut.
Kikkut ukioq manna nersornaaserneqassanersut KODA-p Danmarkimi qullersaqarfiani aalajangerniarneqaleruttorpoq.
Siorna KODA-p akissarsisippai nipilersortartut DDR, Julie Berthelsen aamma Rasmus Lyberth.
