Nunami allanngutsaaliukkami ilisimasassarsiorneq unitsinneqartoq
Ilisimasassarsiorneq aqqaneq-marlunnik inuttaqartoq, Transglobal Car Ekspeditionimik taaguuteqartoq Sermersuakkut Nunattalu avannaani kitaanilu angalasinnaanissamut Naalakkersuisunut qinnuteqarpoq.
Tamannali naalakkersuisut itigartitsissutigaat. Kalaallit Nunaanni Politiit tusagassiuutinut nalunaarummi allapput.
Tusagassiuutinut nalunaarut naapertorlugu – tamanna ilisimassarsiortunut oqartussanullu ajornartoortoqarnerani ikiuiartortussanut ulorianarpallaarneranik pissuteqarpoq. Taamaammat ilisimassarsiortut nunakkut allanngutsaaliukkakkut ingerlaqqissinnaatinneqanngilaq.
Ilisimasassarsiortut qamutit immikkut sanaajusut atorlugit nunarsuup isuanit isuanukarnissamik siunertaqarpoq. Taakku nittartagaat naapertorlugu ilisimasassarsiortut nunanit tamalaaneersut angalanerat USA-mi januaarmi allartippoq, ukiorlu ataaseq qaangiuppat Amerikap kujataani naammassissalluni.
Siriusimit naapinneqartut
Nunatsinnili itivinnissaat maanna unitsinneqarpoq. Nunanit Schengenip avataaneersunit nunatsinnut isernermi killeqarfiit sorliit aqqutigeqqusaaneranut malittarisassaqarpoq. Politiit Issittumi Sakkutooqarfillu Sirius patrulje aqqutigalugu nunap allanngutsaaliukkap killeqarfiini nakkutilliisuupput.
Ilisimasassarsiortut nunatta avannarpasinnerpaanut tikimmata Siriusimit naapinneqartut tusagassiuutinut nalunaarummi allassimavoq.
Siriusimit qimussersut Transglobal Car Ekspeditionimut attaveqarput, tassanilu ilisimassarsiortut oqartussat innersuussutaannik paasilluarneqarsimanersut qulakkeerniarneqarluni. Tamatuma saniatigut ilisimasassarsiortut Station Nordimut ingerlaqqinnissaat qimussersunit nakkutigineqarluni, tassanilu politiinit ilisimassarsiornermik killeqarfinnillu nakkutiginnilluarsinnaanerupput.
Kalaallit Nunaanni Politiit piffissami matumani annerusumik paasissutisseerusunnatik paasissutissiissutigaat.
